Tuesday, November 18, 2008

قضاء مصر بخير بس بيدن في مالطة

امرت محكمة القضاء الاداري في مصر يوم الثلاثاء بوقف تصدير الغاز الى اسرائيل وفق
معاهدة بين البلدين تمتد على 15 عاما.
وقالت المحكمة ان قرارا كهذا يجب ان يجرى
التصويت عليه في البرلمان، "لأن "الموارد الطبيعية الوطنية هي ملك للشعب المصري
والاجيال اللاحقة ولذلك على السلطة التنفيذية ان تحظى بموافقة السلطة التشريعية قبل
اتخاذ قرار كهذا".

لسة القضاء المصري زي ماهو بخيرة مهما دخلة ناس مش ولابد بس المهم ياتري لة دور ولا بيدن في مالطة ... الناس بقالها زمن عمالة تتكلم علي حكاية الغاز المصري اللي بيروح اسرائيل و الكل محروق من الاتفاقية دي و انا منهم .. و الحمد لله ان القضاء حس بينا و حكم بالكلمة اللي ترضي الشعب المصري .. بس السؤال المهم هو هل المحكمة دي بحكمها دي هتقدر و ليها السلطة انها تبطل العقد دي اللي بين مصر و اسرائيل هل لها ان تقوم بألغاء العقد ولا مجرد كلام علي ورق ولا علي رأي مسئول اسرائيلي هو اصلا عبارة عن عقد بين شركتين و الشعب و القضاء يخبط دماغة في الحيطة لان الحكومة في الاخر هتفضل شغالة بالعقد مع اسرائيل

و لان بحكم العادة المصرية كل وزير تبقي الوزارة بتاعت ابوة يتصرف فيها زي ماهو عاوز من غير ما يرجع لمجلس شعب ولا شوري و ملعون ابو الشعب يبقي من حقك ياحاج سامح تعمل اي عقد علي كيف كيفك و تصدر الغاز لاسرائيل حتي لو ببلاش صدقة يعني .. و الي الامام و ولا يهمك قضاء ولا حكم ولا نيلة و يجعلة عامر بحسك ان شاء الله هذا ولن ازيد

Friday, November 7, 2008

الله اكبر اوباما فاز - لعنة الله عالاغبياء

بدأ الرئيس الأمريكي المنتخب باراك أوباما تشكيل إدارته المقبلة باختياره رام
إيمانويل لشغل منصب كبير موظفي البيت الأبيض، فيما عبرت الصحف الإسرائيلية الخميس
6-11-2008 عن ارتياحها لهذا الاختيار مشيرة إلى أصوله الإسرائيلية.
الله اكبر علي هذا الفتح المبين ... اوباما فاز برئاسة امريكا ... ماضحكتش في حياتي قد ما بضحك اليومين دول علي غبائنا و جهلنا احنا العرب من الخليج الي المحيط .. مافيش حديث بين الناس غير عن الفوز الرائع لاوباما و لا تنسي ان تقول اوباما حسين - عشان نعرف ان ابوة كان من اصول مسلمة ... ذهلت قبل الانتخابات بايام ان الناس كانت بتدعي يارب اوباما يفوز .. و ذهلت اكتر بفرحة الناس العوام و المثقفين و الجهلاء و علي كل الفئات .. فرحة كما لو كان هو دي المنتظر ... و كما لو كان امريكا دي بيحكمها شخص واحد هو الرئيس علي الرغم من ان اخر واحد ممكن يأخد قرار لوحدة في امريكا هو الرئيس و كما لو ان امريكا دي مش اللي بيحكم فيها و بيشكل السياسات هي المؤسسات و ليست فرد و كأن الناس مش عارفة انك تشيل بوش و تحط اوباما تشيل كلنتون و تحط قالب طوب برضة السياسة واحدة لانها سياسة دولة مش سياسة فرد .. يعني زيد ولا عبيد ولا حتي نطاط الحيط برضة المحرك واحد وهو اسرائيل في كفة و ام العالم دي كلها في كفة تانية و سياسة الحروب و الي اخرة من كلام فارغ و حسبي الله فيهم جميعا .. و عجبني اوي اول حاجة عملها اوباما دي عشان مافيش حد بقي يقعد يهلل و يقولك مسلم.. انة عين اكبر مستشار لة و اللي بيعتبر تاني واحد في امريكا بعد الرئيس .. اسرائيلي يهودي .. وعشان كدة اسرائيل قامت رفعت لة القبعة تحية لة لان الصلاة اللي عملها عند الحائط المبكي في اسرائيل جابت مفعولها و البقية تأتي ان شاء الله .. المهم مش ننسي ان احنا برضة نقعد ندعي لة و نهلل لة و ربنا يعينة علينا ...